Абай облысы Денсаулық сақтау басқармасының ядролық медицина және онкология орталығы

Жаңалық

Главная > Жаңалық

✅Абай облысының онкологиялық қызметін Үйлестіру кеңесінің отырысы өтті

Бүгін Ядролық медицина және онкология орталығында өткен 2024 жылдың қорытындысы бойынша Абай облысының онкологиялық қызметінің Үйлестіру кеңесінің отырысы өтті.
Отырыс барысында онкологтардың 2024 жылдағы жұмысының қорытындысы шығарылды, оның ішінде өңірдегі қатерлі ісіктердің аурушаңдық көрсеткіштері, ерте анықталу көрсеткіштері, сондай-ақ онкологиялық аурулардың асқыну жағдайлары айтылды. Сонымен қатар Қазақстан Республикасындағы қатерлі ісікке қарсы күрестің 2023-2027 жылдарға арналған Кешенді жоспарының маңызды индикаторларын орындау көрсеткіштері талқыланды.
Өткен жылдың жұмысын қорытындылай келе, ең тиімді жұмыс нәтижесін көрсеткен өңірдің үздік медициналық ұйымдары мен онкологтарына алғыс хаттар табыс етілді.
Сонымен қатар, онкологиялық аурулардың ерте анықталуын жақсартуға және қатерлі ісіктердің асқыну жағдайларын азайтуға бағытталған өңірдің онкологиялық қызметін дамыту перспективалары талқыланды.

📌 Онкологиялық ауруларды диагностикалау мен емдеудің жаңа мүмкіндіктері

Бүгін Ядролық медицина және онкология орталығында диагностикаға, жоспарлауға және сәулелік терапияны қолдануға арналған заманауи құрылғы салтанатты жағдайда іске қосылды. Шараға құрметті қонақтар қатарында облыс басшысы Нұрлан Ұранхаев, сондай-ақ «Қазақстан халқына» қоғамдық қорының басқарма төрайымы Ләззат Шыңғысбаева және Орталық ұжымы қатысты.
Жиынның ашылуында «Қазақстан халқына» қоғамдық қорының басқарма төрайымы Ләззат Шыңғысбаева құттықтау сөз сөйледі. Ол өз сөзінде бүгінгі шараның маңыздылығын атап өтті, сонымен қатар Қордың Қазақстанның онкологиялық қызметін қолдауға бағытталған жұмысына тоқталды.
«Бүгін өте маңызды оқиға, өйткені бүгін пациенттерді диагностикалау және емдеу үшін өте қажетті құрылғы іске қосылуда. Біз Қазақстандағы онкологиялық орталықтарға қажетті құрал-жабдықтарды сатып алуға көмектесіп қана қоймай, дәрігерлерімізді оқыту үшін шетелдік мамандарды тартуға, қажетті онкологиялық препараттарды сатып алуға көмектесуге тырысамыз. Біздің басты басымдылығымыз – пациенттеріміздің медициналық көмек алу үшін шетелге шықпай, барлық қажетті медициналық көмекті өз елімізде алуын қамтамасыз ету», – деді Ләззат Шыңғысбаева.
Іске қосылғалы отырған құрылғының қатарында екі жаңа аппарат: SOMATOM go.Sim компьютерлік томографы (Siemens Healthcare GmbH, Германия) және TrueBeam сәулелік терапия жүйесі (Varian Medical Systems, АҚШ) бар. Техника «Қазақстан Республикасындағы онкологиялық аурулармен күрестің 2023-2027 жылдарға арналған кешенді жоспары» аясында Қазақ онкология және радиология ғылыми-зерттеу институты мен «Қазақстан халқына» қоғамдық қорының көмегімен сатып алынды. Заманауи екі құрылғы да онкологиялық ауруларды диагностикалау мен емдеуде Орталықтың мүмкіндіктерін айтарлықтай кеңейте түседі.
SOMATOM go.Sim компьютерлік томографы сәулелік терапияны дәл жоспарлау үшін ісіктерді егжей-тегжейлі визуализациялауға мүмкіндік береді, кескіннің жоғары сапасын сақтай отырып, сәулелену дозасын азайтады. Ол сондай-ақ емдеу процедурасын дененің табиғи физиологиялық процестерін ескере отырып жүргізуге мүмкіндік береді және сәтті емдеу мүмкіндігін арттыра отырып, ең күрделі сәулелік терапия әдістерін жоспарлау процесін жеделдетеді.
TrueBeam сәулелік терапия жүйесі тек қатерлі жасушаларға ғана әсер ете отырып, сәулелеудің инновациялық әдістерін қолдануға мүмкіндік береді. Ол сонымен қатар динамикалық бақылау технологиясының арқасында ең күрделі және қозғалмалы ісіктерді емдеуге мүмкіндік береді. Сонымен қатар, құрылғыда сеанстардың ұзақтығы бар, бұл жайлылықты арттырады және пациенттердің өмір сапасына кедергі келтірмейді.
Салтанатты шара барысында қонақтарға жаңа құрылғының барлық мүмкіндіктері мен артықшылықтары таныстырылды. Орталық директоры, медицина ғылымдарының докторы, профессор Саят Таңатаров атап өткендей, науқастардың өмірі мен денсаулығы басты басымдық – пациенттердің өмірі мен денсаулығы, жаңа құрылғының арқасында медициналық көмек бұрынғыдан да қолжетімді бола түседі.
«Іске қосылып отырған құрамында компьютерлі томомграф және сәулелік терапия жүйесі бар құрылғы, бұл баға жетпес байлығымыз – адам өмірі мен азаматтарымыздың денсаулығын сақтауға жасалған тағы бір қадам. Жаңа құрылғылар онкологиялық ауруларды егжей-тегжейлі бейнелеуге, емдеуді анағұрлым нақты жоспарлауға және сәулелік терапияның салдарын айтарлықтай азайтуға мүмкіндік береді. Орталықтың жоғары білікті қызметкерлерінің арқасында бұл құрылғы игі мақсатқа қызмет ететін болады. Сондықтан серіктестерімізге, оның ішінде Қазақ онкология және радиология ғылыми-зерттеу институты басшылығына, сондай-ақ «Қазақстан халқы» қоғамдық қорына шынайы алғысымды білдіргім келеді. Біз бірлескен күш-жігеріміз арқылы игілікті іс жолында биік белестерді бағындыра беретінімізге сенімдімін», – деді С.Таңатаров.

📍Ядролық медицина және онкология орталығы-Ядролық физика институты: екіжақты ынтымақтастықтың жаңа кезеңі

11 ақпанда Ядролық медицина және онкология орталығының директоры, м.ғ.д., профессор Саят Таңатаров Алматыдағы Ядролық физика институтына жұмыс сапарымен барды. Делегация құрамына директордың ядролық медицина және стратегиялық жоспарлау жөніндегі орынбасары Баян Атантаева, сондай-ақ Орталықтың бас инженері Медет Идинов кірді.
Кездесуге Ядролық физика институтының бас директоры, ф.-м.ғ.д., КазҰЖҒА академигі Саябек Сахиев, бас директордың өндіріс жөніндегі орынбасары, ф.-м. ғ. к. Евгений Ермаков, сондай-ақ Институттың радиохимия және изотоптық өндіріс ғылыми-техникалық орталығының басшысы Елена Чакрова қатысты.
Кездесу барысында екіжақты ынтымақтастықты нығайтуға және кеңейтуге, оның ішінде онкологиялық ауруларды диагностикалау мен емдеуге арналған радиофармпрепараттар өндіру саласындағы бірқатар өзекті мәселелер талқыланды. Қазіргі уақытта Ядролық физика институты радиофармацевтикалық препараттарды өндіру саласындағы көшбасшылардың бірі болып табылады. Қазақстанда өндірілетін радиофармпрепараттардың барлық атауларының шамамен 85% Ядролық физика институтында өндіріліп келеді. Нақтылайтын болсақ, кездесуде, біздің Орталыққа арналған лютеций негізіндегі радиофармпрепаратты ядролық физика институтында өндіруі талқыланды. Синтезден кейін Орталығымызда оның негізінде қуық асты безінің қатерлі ісігін емдеуде қолданылатын Lu177-PSMA радиофармацевтикалық препараты жасалатын болады. Естеріңізге сала кетейік, жақында Орталығымызда қуық асты безінің қатерлі ісігін диагностикалауда қолданылатын фтор изотопына негізделген 18F-PSMA-1007 радиофармпрепаратының өндірісі жолға қойылған болатын. Lu177-PSMA радиофармацевтикалық өндірісінің басталуымен Орталықта тераностиканың толық циклін, яғни диагностикадан бастап қуық асты безінің обырын емдеуге дейінгі барлық кезеңдерді қамтитын болады.
«Ядролық медицина саласында біздің Орталық соңғы жылдары айтарлықтай нәтижелерге қол жеткізді, бірақ сонымен бірге біз пациенттерімізді диагностика мен емдеудің ең озық әдістерімен қамтамасыз ету үшін осы саланы дамытуды мақсат етіп отырмыз. Біз үшін басты басымдық – тераностиканы, радиофармпрепараттарды пайдаланудың толық циклін енгізу. Орталық пен Ядролық физика институтының екіжақты ынтымақтастығы жылдар өткен сайын дамып, онкологиядағы ядролық медицина саласында жаңа мүмкіндіктерге жол ашатынына сенімдіміз», – деді кездесу барысында Орталық директоры Саят Таңатаров.
Орталық директоры атап өткендей, қазіргі уақытта біздің басты басымдылықтарымыздың бірі – Орталық жұмысына тераностиканы енгізу болып табылады. Бұл радиофармацевтикалық препараттардың кең ауқымын өндіруден бастап, онкологиялық ауруларды диагностикалау мен емдеуде қолдануға дейін толық циклді қамтамасыз ететін Орталық үшін үлкен мүмкіндіктер ашады. Ағымдағы жиын осы міндетті жүзеге асырудың маңызды кезеңдерінің бірі болып табылады.

«Ашық есік күні» өтті

Құрметті достар, бүгін біздің Орталығымызда биылғы жылда ең көлемді «Ашық есік күні» өтті. Бұл күні өңіріміздің ондаған тұрғыны онколог дәрігерлерден кеңес алып, кешенді тексеруден өтті. Атап айтқанда, маммологтың кеңесін 76 адам алды, 81 адам онкоурологтың, онкоЛОР дәрігері мен онкохирургтың, 44 онкогинекологтың, 45 адам эндокринологтың кеңесін алды. 250-ге жуық диагностикалық процедуралар жүргізілді. Осының нәтижелері бойынша көптеген патологиялар, соның ішінде онкологияға күдікті патологиялар да анықталды. Барлық анықталған дерттер бойынша дәрігерлерден егжей-тегжейлі ұсыныстарын берілді.
Айта кету керек, барлық онколог дәрігерлер, бейінді мамандар, диагностикалық процедуралар мен зертханалық зерттеулер жүргізген мамандар, сондай-ақ емхананың медбикелері бүгін де жоғары кәсібилік пен іс-әрекеттің үйлесімділігін көрсетті. Осының арқасында «Ашық есік күніне» келген барлық пациенттердің ешқайсысы назардан тыс қалмған жоқ.
Қорытындылай келе, мұндай скринингтік тексерулер қатерлі ісіктерді ерте кезеңде анықтауға, сондай – ақ асқынған қатерлі ісік ауруларының санын азайтуға мүмкіндік беретін онкологиялық аурулармен күрестегі маңызды кезең екенін атап өткен жөн. Сондықтан баршаңызды өз денсаулығына немқұрайлы қарамауға және уақытында тексеруден өтуге шақырамыз. Ал «Ашық есік күніне» қатысушылардың барлығына – зор денсаулық пен амандық тілегіміз келеді.

Ядролық медицина және онкология орталығы фтор изотопы негізіндегі жаңа 18F-PSMA-1007 радиофармпрепаратын шығарып, қолдана бастады.

Осы күндері ядролық медицина және онкология Орталығында ядролық медицина мамандары үшін радионуклидті бейнелеуде, атап айтқанда ПЭТ/КТ зерттеулерінде қолданылатын 18F-PSMA-1007 фтор негізіндегі простата-спецификалық мембрана-антигенді қолдану бойынша Шеберлік сабағы өтуде. Жетекші консультанттар ретінде Петровский атындағы РҒХО (Ресей) диагностиканың радионуклидтік әдістері бөлімінің меңгерушісі сәулелік диагностика және терапия кафедрасының профессоры, м.ғ.д. Игорь Альбертович Знаменский және Н.Н.Александров атындағы Республикалық онкология және медициналық радиология ғылыми-практикалық орталығының (Беларусь) изотоптық циклотрондық-радиохимиялық зертханасының меңгерушісі– Игорь Александрович Ковалев мастер-класс өткізуде.
Айта кету керек, Қазақстанда бұл радиофармпрепарат алғаш рет өндіріліп отыр. 18F-PSMA-1007 фтор-18 – радионуклидті фтор изотопына негізделген радиоактивті белгісі бар. Осының арқасында пациенттің денесіне енгізілгеннен кейін препарат простатада жинақталуға бейім, соның арқасында препараттың жинақталуы және жинақталу дәрежесі мен орналасуы бойынша пациенттің простата обыры, метастаздары немесе басқа да онкологиялық патологияларының бар-жоғын дәл анықтауға болады. Аталған жинақталу дәрежесі ПЭТ-КТ зерттеулерінің арқасында бақыланады, бұл бейнелеу әдісі сәулелік диагностика сияқты басқа дәстүрлі бейнелеу әдістерінен едәуір асып түседі.
Айта кету керек, радиофармпрепаратты өндіруден бастап ПЭТ/КТ тексерулерін жүргізуге дейінгі барлық процестер толығымен біздің орталықтың базасында жүзеге асырылады. Күрделі және көп деңгейлі технологиялық процестің басында арнайы аппарат – циклотронда фтор-18 изотопы жасалады, содан кейін бұл изотоп синтез зертханасына жеткізіледі, онда технолог химиктер 18F-PSMA-1007 радиофармпрепаратын синтездейді. Ол әрі қарай сапаны бақылау зертханасына жіберіледі, онда аналитикалық химиктер оның барлық сапа стандарттарына сәйкестігін тексереді. Сапа бақылауынан өткеннен кейін радиофармпрепарат радиофармацевттерге жеткізіледі, онда әрбір пациенттің жеке физиологиялық ерекшеліктері ескеріле отырып, инъекциялар дайындалады. Осыдан кейін, арнайы қорғаныс контейнерінде пайдалануға дайын радиофармпрепарат радионуклидті диагностика бөлімшесіне жеткізіледі, осы бөлімшеде ол пациентке салынады. Препаратты енгізгеннен кейін пациент ағзада препараттың жинақталу процесі жүріп жатқан кезде арнайы палатада күтуі керек, содан кейін пациент ПЭТ/КТ тексеруден өтеді, оның нәтижелеріне онколог дәрігерлер толығымен талдау жасайды.
ПЭТ/КТ зерттеуінің нәтижелерін талдау немесе сипаттау ең маңызды кезеңдердің бірі болып табылады, себебі оның нәтижелері бойынша пациенттің диагнозы қойылып ғана қоймай, сонымен қатар емдеу тактикасы да анықталады және қолданылатын емнің тиімділігі бақыланады. Шеберлік сабағының барысында нәтижелерді оқудың барлық ерекшеліктері туралы профессор Игорь Знаменский айтып берді.
«Шеберлік сабағы барысында біз диагностика процесінде радиофармпрепаратты қолдануға, препарат пациенттің денесіне қалай енгізілетініне, қандай дозада, жинақталуға қанша уақыт кететініне, пациенттің ағзасында препараттың жинақталу процесінде қандай күйде болуына, зерттеу алдында қандай дайындық қажет екеніне назар аударатын боламыз. Сондай – ақ, ПЭТ/КТ зерттеулерін жүргізгеннен кейін нәтижелерді сипаттау әдістемесі бойынша консультация жүргіземіз», – деп атап өтті Игорь Знаменский.
Тағы бір атап өтетіні, осымен іске қосылып отырған фтор негізіндегі 18F-PSMA – 1007 радиофармпрепараты біздің орталықта толық циклі игерілген үшінші радиофармпрепарат болды. Осы үлкен жетістік онкологиялық ауруларды, оның ішінде простата обырын диагностикалау және емдеу мүмкіндіктерін едәуір кеңейтуге және одан әрі терапияны жоспарлауға мүмкіндік береді.

Колледж студенттеріне арналған оқыту семинары

Ісікке қарсы Халықаралық күрес күніне арналған онкүндік аясында Ядролық медицина және онкология орталығының онкологтары Д.Қалматаев атындағы мемлекеттік жоғары медициналық колледжінің студенттеріне оқыту семинарын өткізді. Кездесу тақырыбы Онкологиялық аурулардың алдын алу және ерте диагностикалау болды. Орталықтың онкологтары қатерлі ісіктерді диагностикалау және емдеу саласындағы білімдері мен тәжірибелерімен бөлісті, Қазақстанда жұмыс істейтін скринингтік бағдарламаларға ерекше назар аударылды. Сонымен қатар, кездесу барысында онкологиялық аурулардың маңызды аспектілері, оның ішінде қатерлі ісіктің алғашқы белгілері мен алдын алу шаралары талқыланды. Сондай-ақ, колледж студенттері онкологтарға ойда жүрген сауалдарын қоюға да мүмкіндік алды.

2024 жылдың қорытындысы бойынша есеп беру жиындары өтуде

Осы аптада Ядролық медицина және онкология орталығында есеп беру жиындары өтуде, онда Орталықтың барлық бөлім меңгерушілері және құрылымдық бөлімше жетекшілері 2024 жылы атқарылған жұмыстарын қорытындылады. Жиын барысында өңірдің онкологиялық қызметіндегі жұмыстардың негізгі аспектілері, оның ішінде Абай облысы бойынша онкологиямен сырқаттанушылық көрсеткіштері, қатерлі ісікті ерте анықтау, қатерлі ісіктердің асқынған жағдайларын азайту бойынша жұмыстар талқыланды. Өңірдің онкологиялық қызметінің мәселелері мен даму перспективалары да айтылды.

Ядролық қауіпсіздік және физикалық қорғау саласындағы жаңа тәсілдері

Дипломатиялық нотаға сәйкес (Дипломатиялық нота № 0950/24), АҚШ Энергетика министрлігінің Ұлттық ядролық қауіпсіздік басқармасының Радиологиялық қауіпсіздік басқармасы 2025 жылғы 28-31 қаңтар аралығында Қазақстан Республикасы Энергетика министрлігінің «Ядролық физика институты» РМК Ядролық қауіпсіздік оқу орталығының базасында (Алматы қ.) «Физикалық қорғау және қауіпсіздікті басқару» атты радиоактивті көздердлен физикалық қорғау қауіпсіздікті басқару саласындағы дағдыларды дамыту мақсатында оқу курстары өтті. Еліміздің барлық онкологиялық орталықтарынан мамандар шақырылды. Біздің орталықтан физикалық қорғау инженері Тұрсын Төлеген, инженерлік-техникалық қамтамасыз ету қызмет басшысы Даулет Кагазбеков қатысты.
Бұл семинардың маңызы өте зор екені көрініп тұр! Ядролық қауіпсіздік және физикалық қорғау саласындағы білімді жетілдіру, әсіресе онкология орталықтарында, қауіпсіздік пен қорғаныс деңгейін көтеруге үлкен ықпал етеді. Қатысушылардың тәжірибе алмасуы мен алған білімдерін практикалық тұрғыда қолдануы бұл саланың дамуына зор әсерін тигізері сөзсіз.

✅Білгенге абзал

2024 жылы Абай облысы бойынша қатерлі ісік ауруының 1 641 жаңа жағдайы тіркелді. Ең көп өлім-жітім тіркелген, анағұрлым қауіпті онкологиялық аурулар – өкпе обыры, асқазан обыры, колоректальды обыр, сүт безі обыры, сондай-ақ өңеш обыры.
Қатерлі ісік немесе онкология-бұл иммунитет белсенділігінің төмендеуі аясында жасушалардың бөліну процесінің бұзылуына негізделген ауру. Қатерлі ісік жасушалары тез бөлінеді, сондықтан адамда ісік пайда болады, ол локализация орнында тіндерге әсер етеді, қоршаған құрылымдарға еніп, оларды бұзады және/немесе қысады, сонымен қатар метастаздар арқылы басқа органдарға таралады.
Қазіргі уақытта қатерлі ісіктің нақты себептері белгісіз, бірақ қатерлі ісік қаупін арттыратын бірқатар факторлар бар. Олардың ішінде генетикалық бейімділік, физикалық (тікелей күн сәулелері) немесе химиялық (алкоголь, темекі) канцерогендердің әсері, вирустардың, бактериялардың, паразиттердің кейбір түрлері және қартаю, сондай-ақ онымен байланысты қауіп факторларының жинақталуы.
Клиникалық көрініс неоплазманың түріне байланысты. Дегенмен, бірқатар белгілердің пайда болуы дәрігерге қаралуға себеп болуы керек. Олардың қатарында тұрақты шаршау, дене температураның жоғарылауы, лимфа түйіндерінің ұлғаюы, салмақ жоғалту, тәбеттің нашарлауы, ұзақ жөтел, жұмсақ тіндердегі немесе бездердегі қатаюлар, меңдердің мөлшері мен түсінің өзгеруі, сондай-ақ дененің, бастың ауыруы.
Қазіргі уақытта қатерлі ісік диагностикасының кең әдістері қолданылады, соның ішінде инвазивті, ағзаға араласатын және инвазивті емес түрлері қолданылады. Бірінші топта биопсия: пациенттен зертханада тексеру үшін тіннен бөлшек алу. Сонымен қатар ісік онкомаркерлерге арналған зертханалық қан тестілері. Инвазивті емес зерттеу әдістерінің екінші тобы жоғары технологиялық зерттеу әдістерін қамтиды, мысалы компьютерлік томография, магнитті-резонанстық томография, позитронды-эмиссиялық томография, ультрадыбыстық зерттеу.
Қатерлі ісікті емдеуде үш негізгі тәсілді ажыратуға болады: хирургия, химиотерапия, сәулелік терапия. Бұл әдістер тиімді болып қала береді, бірақ жыл сайын олар ісіктің белгілі бір түрімен күресуге бағытталған аялағыш болады.
Қатерлі ісік ауруларының жартысына жуығы қауіп факторларын жоққа шығару арқылы алдын алуға болады, дейді ДДҰ. Күйзелістің, семіздіктің, физикалық белсенділіктің қатерлі ісік қаупіне тікелей әсері туралы ғылыми дәлелдер әлі жоқ. Профилактикалық ұсыныстарға темекі шегуден және алкогольден бас тарту, ультракүлгін сәулелерден қорғану, созылмалы инфекцияларды тоқтату, сондай-ақ күдікті белгілер болмаса да мерзімді скринингтік тексерулерден өту кіреді.
Қазақстанда іске асырылып жатқан, ісікке дейінгі және ісік ауруларын ерте анықтауға бағытталған скринингтік бағдарламалар: сүт безі скринингі, жатыр мойны скринингі, сондай-ақ тоқ ішек және тік ішек скринингі.

✅Халықаралық қатерлі ісікке қарсы күрес күніне арналған онкүндік

Құрметті достар! Осы күндері Орталығымызда 4 ақпанда – Халықаралық қатерлі ісікке қарсы күрес күніне арналған онкүндік өтеді. Бұл күндері біз аймақтағы ең көп кездесетін онкологиялық аурулардың негізгі мәселелрі, аспектілері мен ерекшеліктеріне назар аударатын боламыз. Қатерлі ісіктердің алдын алу, диагностикалау және емдеу шаралары туралы да айтылатын болады. Сондай-ақ, осы күндері кезекті Ашық есік күні өтеді деп жоспарлануда, оның барысында кез келген адам алдын ала жазылусыз, дәрігердің жолдамасынсыз біздің онкологтардан тегін кеңес алып, кешенді тексеруден өте алады. Іс-шараның күнін кейінірек әлеуметтік желілердегі парақшаларымызда хабарлайтын боламыз. Сондықтан біздің жаңалықтарымызды қадағалап отыруды ұмытпаңыздар және пайдалы сілтемелермен бөлісуді де ұмытпаңыздар!

Ядролық медицинадағы жаңа мүмкіндіктер

27-31 қаңтар аралығында АҚХА-нің «Шығыс өңірінің ядролық медицина және онкология орталығында клиникалық тәжірибені жақсарту» жобасы аясында біздің орталықтың бір топ мамандары Португалияның Коимбра қаласында Institute for Nuclear Sciences Applied to Health – денсаулық сақтауда қолданылатын ядролық ғылымдар институтытында ғылыми сапарда жүр. Делегацияны Орталық директоры, м.ғ.д., профессор Саят Таңатаров басқарды. Делегация құрамына радиациялық қауіпсіздік қызметінің жетекшісі Дәурен Әділбаев пен РФДП өндірісі және жабдықтау бөлімінің меңгерушісі Әсет Сәрсекеев те кірді.
Денсаулық сақтауда қолданылатын ядролық ғылымдар институты – Португалиядағы ең көне университеттердің бірі – Коимбра университетінің зерттеу бөлімі, сонымен қатар ядролық медицина саласындағы ғылыми және клиникалық зерттеулерде көшбасшы болып табылады. Жұмыс сапары барысында біздің Орталықтың мамандары португалдық әріптестердің онкологиялық ауруларды диагностикалау мен емдеуде қолданылатын радиофармпрепараттар өндірісіндегі жұмыс тәжірибесін көріп, білді. Әсіресе, институттың галлий-68 негізіндегі радиофармпрепаратты өндіру мен қолданудағы мүмкіндіктері мен жетістіктері ерекше қызығушылық тудырды, бұл бағытта институт ғалымдары мен инженерлері галлий-68 радиофармпрепаратын сұйық өндірудің патенттелген бірегей әдісін медициналық практикаға енгізу арқылы үлкен нәтижелерге қол жеткізгенін атап өткен жөн. Бүгінгі таңда әлемде галлий-68 негізіндегі радиофармпрепаратының өндірісі жолға қойылған ғылыми және медициналық орталықтар саны санаулы. Тағы бір атап өтетіні, қазіргі уақытта институт мамандары мыс изотоптары негізінде радиофармпрепараттар өндіруге бағытталған зерттеулер жүргізуде.
Ғылыми сапар аясында біздің делегация ICNAS директоры Antero Abrunhosa, патенттелген галлий-68 радиофармпрепаратының сұйықтықты өндіру әдістемесінің авторы – профессор Francisco Alves және циклотрондарды жаңғырту жөніндегі бірегей жобалардың авторы, физик, PhD – Sergio do Carmo-мен кездесті.
Ғылыми сапар Орталығымыздың дамуындағы маңызды кезең болды, атап айтқанда радиофармпрепараттарды өндіру мен қолданудың барлық техникалық және технологиялық аспектілерін зерделеуге мүмкіндік беріп қана қоймай, Орталықтың барлық буындарының тиімді жұмысы мен өзара іс-қимылын қамтамасыз ететін Денсаулық сақтау менеджментіне де көп назар аударылды. Осы бағыттар бойынша іс-сапар барысында біздің мамандарға оқыту семинарлары өткізілді.
Алынған тәжірибе мен білім таяу болашақта ядролық медицинаны қолдану жөніндегі Орталықтың мүмкіндіктерін кеңейтуге бағытталатын болады, атап айтқанда, АҚХА мамандарының қолдауымен Орталық базасында онкологиялық ауруларды диагностикалау мен емдеуде жаңа мүмкіндіктер ашатын, бірқатар радиофармпрепараттар өндірісін енгізіп, қолдану жоспарлануда.

✅Қорытындылар мен перспективалар

Осы күндері еліміздің оңтүстік астанасында, С. Ж. Асфендияров атындағы қазақ Ұлттық медицина университетінде 2024 жылдың 12 айының қорытындысы бойынша Қазақстан Республикасы онкологиялық қызметінің Үйлестіру кеңесінің отырысы өтуде. Кездесу барысында еліміздегі онкологиялық көмек жұмысының маңызды аспектілері мен негізгі көрсеткіштері талқыланады, қорытындылар шығарылып, перспективаға арналған басым бағыттар белгіленеді.
Үйлестіру кеңесінің отырысы барысында жалпы Қазақстанның онкологиялық қызметінің, сондай-ақ өңірлердегі онкологиялық орталықтардың жұмысы талқыланады. Өткен жылдың 12 айының қорытындысы бойынша жұмыс көрсеткіштерін Абай облысының Ядролық медицина және онкология Орталығы да ұсынды, осы бойынша Орталықтың директоры, медицина ғылымдарының докторы, профессор Саят Таңатаров баяндама жасады.
Баяндамада Орталық жұмысының, сондай-ақ Абай облысындағы онкологиялық көмектің негізгі индикаторлары, оның ішінде онкологиялық сырқатқа шалдығу мен одан болатын өлім-жітім көрсеткіштері айтылды. Орталық директоры атап өткендей, өткен жылы өңірде 2023 жылмен салыстырғанда қатерлі ісік ауруына шалдыққандар санының 0,6% – ға өсуі байқалады, алайда өткен жылы онкологтар қатерлі ісіктен болатын өлім-жітімнің 3,2% – ға төмендеуіне қол жеткізді, 2023 жылмен салыстырғанда ерте диагностикалау мүмкіндіктері жақсарды және қатерлі ісік ауруларының асқыну жағдайларының саны азайды. Тағы бір атап өтетіні – бүгінгі күнде өңірімізде адамдардың өмірі мен денсаулығына ең көп қауіп төндіретін қатерлі дерттердің қатарында өкпе, асқазан, өңеш, колоректальды қатерлі ісік және сүт безі қатерлі ісігі болып табылады.
Баяндама барысында Орталық директоры Саят Таңатаров 2023-2027 жылдарға арналған онкологиялық аурулармен күрес жөніндегі Кешенді жоспарды іске асырудың негізгі индикаторларын, сондай-ақ өңірде онкологиялық көмекті одан әрі дамытуға бағытталған шараларды атап өтті. Мәселен, биылғы жылдың бірінші тоқсанында Абай облысының Ядролық медицина және онкология орталығы базасында сараптамалық эндоскопиялық орталықтың ашылуы жоспарлануда. Бұл өз кезегінде Орталықтың бірқатар қатерлі ісіктерді диагностикалау мен емдеудегі мүмкіндіктерін едәуір жақсартады.

Медициналық терминология

абсцесс абсес
азооспермия азооспермия
артериовенозная  фистула артериовеналық жыланкөз
асцит шемен
атеросклеротическая бляшка атеросклерозды түйін
бедренная кость ортан жілік
большеберцовая кость асықты жілік
брюшная аорта іштік қолқа
буж сүмбі
бужирование сүмбілеу
вдавление батыңқы
венозная недостаточность веналық жетіспеушілік
вертлужная впадина ұршық ойыс
верхняя (средняя, нижняя) прямокишечная артерия тік ішектік жоғарғы (ортаңғы, төменгі) артерия
ветвь тармақ
внутренняя грудная артерия кеуделік ішкі артерия
возвратный нерв қайырылма нерв
восходящая ободочная кишка жоғарылаған жиекті ішек
гангрена гангрен
геморрой геморрой
гладкая мускулатура тегіс салалы бұлшықет
глазница көзұя
голень сирақ
голосовая связка дауыстық байлам
гортань көмей
грудная клетка кеуде торы
двенадцатиперстная кишка он екі елі ішек
диафрагма көкет
дистрофические изменения дистрофиялық өзгерістер
дупликатура қосқаттам
дыхательная система тыныс алу жүйесі
заднепроходный канал артқы өтіс өзегі
задний проход артқы өтіс
зонд сүңгі
инкапсулирование қапшықтау
инкапсулированный абсцесс қапшықталған абсес
инфильтрат инфильтрат
капиллярная сеть капиллярлық тор
киста жылауық
кожный покров тері жабыны
комбинированные оперативные вмешательства біріккен операция жасау

 
копчик құйымшақ
кости предплечья білек сүйектері
кости таза (тазовые кости) жамбас сүйектері
лобковая кость қасаға сүйек
локтевая артерия шынтақ жіліктік артерия
локтевая кость шынтақ жілік
лучевая артерия кәрі жіліктік артерия
лучевая кость кәрі жілік
малоберцовая кость асықты жілік шыбығы
микроцистис микроцистис
мочевой пузырь несепқуық
мышечная оболочка бұлшықетті қабық
непроходимость бітеліс
нерв нерв
неспецифический язвенный колит бейспецификалы жаралы колит
нефролитотомия нефролитотомия
нефросклероз нефросклероз
нефротомия нефротомия
нефроэктомия нефроэктомия
нисходящая ободочная кишка төмендеген жиекті ішек
носовая раковина мұрын кеуілжірі
общая (наружная, внутренняя) артерия жалпы (сыртқы, ішкі)  мықын артериясы
общий желчный проток жалпы өт түтігі
околоушная железа шықшыт безі
пальцы стопы бақай
паренхиматозный орган паренхималық ағза
первичный перитонит ілкі перитонит
перегородка қалқа
перешеек қылта
перикард жүрекқап
перстневидный хрящ жүзіктәрізді шеміршек
печеночная сумка бауырқап
пластика пластика
плевра өкпеқап
плечевая кость тоқпан жілік
поджелудочная железа ұйқы безі
подкожно жировая клетчатка теріасты шелмай
подколенная ямка тақым шұңқыры
подмышка қолтық
подошва табан
подслизистая основа шырышасты негіз
позвоночный столб омыртқа бағанасы
поперечная ободочная кишка көлденең жиекті ішек
поперечно-полосатая мускулатура көлденең жолақты бұлшықет
промежность бұтаралық
прямая и боковая  проекция тік және бүйір проекция
прямая кишка тік ішек
разлитый перитонит жайылған перитонит
ранняя инфекция бастапқы инфекция
расширенные оперативные вмешательства кеңейтілген операция жасау
релаксационный релаксациялық
сальник шарбы
сальниковая сумка шарбықап
седалищная кость шонданай сүйек
селезенка көкбауыр
серозная оболочка сірлі қабық
сигмовидная ободочная кишка сигматәрізді жиекті ішек
слепая кишка соқыр ішек
столб бағана
стопа аяқбасы
стриктура тарылу
толстая кишка тоқ ішек
тонкая кишка аш ішек
тромб тромб
фасция шандыр
фиброзная капсула почки бүйректің фиброзды қапшығы
фимоз қылкүпек
эпифренальный дивертикул көкетүсті дивертикул
язвенный дефект ойықжара дефекті
ятрогения ятрогения

Жатыр мойны обыры туралы хабардар болу айы

Құрметті достар! Қаңтар айы бойы біздің Орталығымызда жатыр мойны обыры туралы хабардар болу айы өтетін болады. Жатыр мойны обыры- қатерлі және ең көп таралған қатерлі ісіктердің бірі, ол онкологиялық аурулардың жалпы құрылымында жетекші орындарға ие. Қаңтар бойы біз осы ауру туралы, оның ішінде алдын алу шаралары, пайда болу себептері, алғашқы белгілері туралы және тағы басқа пайдалы ақпаратпен мүмкіндігінше толығырақ бөлісетін боламыс. Сіздерді біздің сарапшылардың баяндамалары, осы тақырып бойынша пайдалы мақалалар күтеді, сондай-ақ ашық есік күнін өткізу де жоспарланған, оның барысында кешенді тексеруден өтуге болады. Өткізілетін іс-шаралардың барлық егжей-тегжейлері біздің әлеуметтік желілердегі парақшаларымызда айтылатын болады. Сондықтан бізге жазылуды ұмытпаңыздар және пайдалы сілтемелермен бөлісулеріңізді сұраймыз.

Жаңа жыл құтты болсын!

Бүгін Орталығымызда алдағы жаңа 2025 жылды мерекелеуге арналған салтанатты іс-шара өтті. Бұл күні көптеген құттықтаулар мен жылы лебіздер айтылды.
Іс-шараны Орталық директоры, м. ғ. д., профессор Саят Таңатаров құттықтау сөзімен бастады.
«Құрметті әріптестер! Баршаңызды алдағы Жаңа жылмен шын жүректен құттықтаймын. Жаңа жыл тек қуанышты сәттерге толы болсын. Баршаңызға зор денсаулық, амандық, табыс тілеймін. Отанымыз өркендей берсін. Барлық мақсаттар, тілектеріңіз орындалсын. Алда көптеген міндеттер тұр. Сондықтан, жаңа жылыда жаңа күшпен, ұйымшыл ұжым болып жұмысқа кірісейік. Мерекелеріңіз құтты болсын, құрметті әріптестер», – деді Саят Таңатаров.
Ұжым алдында директордың орынбасарлары, Орталықтың бөлімшелерінің бірқатар меңгерушілері де құттықтау сөз сөйледі.
Мерекелік іс-шараның тағы бір жарқын бөлігі – салтанатты марапаттау рәсімі болды. «SENIM» Денсаулық сақтау жүйесі қызметкерлерінің салалық кәсіподағының қолдауымен орталықтың бірқатар қызметкерлері жемісті және табысты қызмет атқарғаны үшін түрлі номинациялардағы грамоталармен және алғыс хаттармен марапатталды.
Сондай-ақ, шара барысында түрлі-түсті концерттік бағдарлама да ұсынылды.

? Тағайындалуымен құттықтаймыз!

26 желтоқсаннан бастап «Ядролық медицина және онкология орталығы» ШЖҚ КМК директоры лауазымына м.ғ.д., профессор Саят Таңатаров тағайындалды. Жаңа тағайындалу туралы бүгін ұжыммен кездесу барысында облыстың денсаулық сақтау басқармасының басшысы Талғат Молдабеков мәлімдеді.
Конкурстық рәсімдердің қорытындысы бойынша, «Ядролық медицина және онкология орталығы» ШЖҚ КМК Байқау кеңесінің 2024 жылғы 23 желтоқсандағы №13 хаттама шешіміне сәйкес, ҚР Еңбек кодексінің 32,34-баптарына сәйкес, 2024 жылғы 25 желтоқсандағы №94 ЖҚ АО ДСБ басшысының бұйрығымен, 26 желтоқсаннан бастап «Ядролық медицина және онкология орталығы» ШЖҚ КМК директоры лауазымына м.ғ.д., Саят Таңатаров тағайындалды. Денсаулық сақтау басқармасының басшысы Талғат Молдабеков жаңа тағайындауды жариялап, орталыққа жемісті жұмыс пен үлкен табыстар тіледі.
«Құрметті әріптестер, Орталық біздің облысымыз үшін ғана емес, жалпы еліміз үшін де үлкен маңызға ие, өйткені мұнда диагностика мен емдеудің бірегей әдістері енгізілген. Жылдан жылға Орталық өз мүмкіндіктерін тек кеңейтіп келеді. Саят Замамбекұлының басшылығымен Орталық бұл үрдісті жалғастыратынына сенімдімін. Бүкіл ұжымға табыс пен жаңа жетістіктер тілеймін. Алдағы мерекелеріңізбен», – деді Талғат Молдабеков өзінің құттықтау сөзінде.
Орталық директоры лауазымына тағайындалған Саят Таңатаров та құттықтау сөз сөйледі.
«Құрметті әріптестер, бірінші кезекте облыс және денсаулық сақтау басқармасының басшылығына сенім артқаны үшін алғыс білдіргім келеді. Орталықтағы береке-бірлігі мықты ұжымның, қабілетті, іскер мамандардың қол жеткізген жетістіктері көп, оларды бірлескен күш-жігердің арқасында оларды арттыратынымызға сенімдімін. Алда көптеген жоспарлар, міндеттер тұр, сондықтан біртұтас, ұйымшыл ұжым болып қоғам мен азаматтарымыздың игілігі үшін жұмыс істеуіміз қажет. Баршаңызға сәттілік тілеймін, келе жатқан жаңа жылдарыңызбен», – деді Саят Таңатаров.
Танатаров Саят Замамбекұлы-медицина ғылымдарының докторы, «СМУ» КеАҚ профессоры. Жоғары біліктілік санатындағы денсаулық сақтау менеджері, жоғары біліктілік санатындағы денсаулық сақтау ісін ұйымдастырушы, жоғары біліктілік санатындағы дәрігер анестезиолог–реаниматолог.
1996-2002 жылдары Семей қаласының онкологиялық диспансерінде дәрігер анестезиолог-реаниматолог болып жұмыс істеді. 2002 жылдан 2013 жылға дейін анестезиология және реанимация бөлімін басқарды. 2013 жылы Көкпекті ауданының ауданаралық ауруханасының бас дәрігері болып тағайындалды. 2014-2024 жылдары Д.Қалматаев атындағы мемлекеттік жоғары медициналық колледжінің директоры болып жұмыс істеді. 2024 жылдың желтоқсанында «Ядролық медицина және онкология орталығы» ШЖҚ КМК директоры болып тағайындалды.
Көптеген ғылыми еңбектердің, мақалалар мен жарияланымдардың, әдістемелік құралдардың, 4 рационализаторлық ұсыныстардың авторы.
Денсаулық сақтаудағы көпжылдық және жемісті клиникалық, ғылыми, ұйымдастырушылық қызметі үшін бірқатар мемлекеттік марапаттармен, оның ішінде ҚР Денсаулық сақтау министрлігінің, ҚР Білім Министрлігінің, Денсаулық сақтау басқармасының медальдарымен және грамоталарымен марапатталған.

? В гепатиті-алдын алуға болатын вирустық ауру

Құрметті достар! Желтоқсан айы бойы біздің Орталығымызда асқазан мен бауырдың қатерлі ісіктері туралы хабардар болу айы өтуде. Олай болса, осы мақалада біз В гепатиті сияқты қауіпті вирустық жұқпалы ауру туралы айтқымыз келеді. Атап өткендей, В гепатиті — бауырды зақымдайтын, В гепатиті вирусы (HBV) тудыратын жұқпалы ауру. Ол адамның қаны және басқа биологиялық сұйықтықтары арқылы беріледі. Ауру жедел және созылмалы түрінде болуы мүмкін, ауыр жағдайларда циррозға немесе бауырдың қатерлі ісігіне әкеледі.
В гепатитінің ең жиі кездесетің белгілерінің ішінде -тәбеттің төмендеуі, жүрек айнуы мен құсу, іштегі ауырсынулар, бауырдың ұлғаюы, сонымен қатар тері мен көздің сарғаюы. Кейбір адамдарда ауру айқын белгілерсіз болуы мүмкін, әсіресе бастапқы сатыда, бірақ оның өзінде олар вирусты таратушы болып қалуы және вирусты басқаларға жұқтыруы мүмкін.
В гепатиті инфекцияның алдын алуға болатын вирустық аурулардың бірі болып табылады. Вакцинация-бұл аурудың алдын-алудың негізгі құралы және цирроз бен бауырдың қатерлі ісігі сияқты ауыр зардаптардың алдын алуға көмектеседі. Вакцина салу вирус организмге түскен жағдайда онымен күресетін антиденелерді шығаруға иммундық жүйені ынталандырады.
Екпе әдетте үш кезеңде жасалады. Вакцинация туылғаннан кейінгі алғашқы 24 сағатта басталады, содан кейін 1 және 6 айдан кейін қайталанады. Алайда, егер қандай да бір себептермен адам балалық шақта екпе алмаған болса, вакцинацияны кез-келген жаста жасауға болады.
Вакцинация алу ұсынылатын негізгі топтар – жаңа туған нәрестелер, денсаулық сақтау мамандары және биологиялық сұйықтықтармен жұмыс жасайтын адамдар, қанмен байланысу қаупіне байланысты операциялар немесе процедураларды жоспарлайтын адамдар және созылмалы бауыр немесе бүйрек аурулары бар адамдар.

Абай облысы денсаулық сақтау басқармасы «Ядролық медицина және онкология орталығы» ШЖҚ КМК директорының бос лауазымына орналасу үшін әңгімелесуге жіберілген кандидаттың тізімі

Абай облысы денсаулық сақтау басқармасы «Ядролық медицина және онкология орталығы» ШЖҚ КМК директорының бос лауазымына орналасу үшін әңгімелесуге жіберілген кандидаттың тізімі (more…)

Назым Бекішева – Қазақстанның құрметті мейіргері атанды

Жақында біздің орталықтың реанимация және қарқынды терапия бөлімшесінің анестезист-мейіргер Назым Бекішева республикалық байқаудың жеңімпазы болып «Қазақстанның құрметті мейіргері» атанды. Мұндай лайықты марапат біздің әріптесіміздің көп жылдық қажырлы еңбегін мойындау мен жоғары бағалаудың нәтижесі болды.
Назым Бекішева онкологиялық қызметте 16 жылдан астам уақыт жұмыс істеп келеді. Хирургия бөлімінде істеген біршама жылдарда, Орталығымызда ішек стомасы бар науқастарға, яғни хирургиялық операциядан кейін ішектің күрделі аурулары бар науқастарға оңалту және медициналық көмек көрсету ісін енгізу мен дамытуға белсенді қатысты.
«Мен әрқашан дәрігер болуды, адамдарға көмектесуді, қоғамға пайда әкелуді армандайтынмын. Сондықтан мен үшін мамандық таңдау айқын болды. Оқуды бітіргеннен кейін Орталығымызда алғашқы күндерден бастап жұмыс оңай болған жоқ, тіпті қиын, жауапты деп айтса да артық емес. Алайда тамаша дәрігерлер, мықты тәлімгерлер, ұйымшыл ұжымның арқасында кез-келген қиындықтардан өте алдық», – дейді Назым Бекішева.
Соңғы төрт жылдан астам уақыт бойы Назым реанимация және қарқынды терапия бөлімінде анестезист-мейіргер лауазымында еңбек етіп келеді. Айта кету керек, жалпы денсаулық сақтаудың барлық буындарында орта медициналық персонал сенімді тірек және дәрігерлердің көмекшісі болып табылады, алайда реанимация бөліміндегі мейіргерлердің жұмысы одан да жоғары маңыздылыққа ие, себебі олардың әрбір қадамы пациенттердің өмірі мен денсаулығымен тікелей байланыста, сондықтан мамандардан әрқашан жинақылықты, өзгермелі жағдайларда жедел әрекет етуді, қойылған міндеттерді дәл орындауды талап етеді, мейіргерлерге жүктелген міндеттер де аз емес. Назым Бекішеваға келетін болсақ, ең бастысы ол хирургиялық операцияларға қатысып, наркозға дейінгі дайындықта, анестезия кезінде, наркоздан кейінгі кезеңде дәрілік заттардың қолданылуын қадағалайды.
«Операция кезінде барлық медицина қызметкерлері үздіксіз қарбаласта жүреді, себебі тіпті минуттар емес, санаулы секундтар ішінде дереу қабылданбаған шаралар жағымсыз салдарға әкелуі мүмкін. Сондықтан біз әрқашан жинақы, жедел әрекет етіп, дәрігердің алдымызға қойған барлық тапсырмаларын орындауымыз керек. Әрбір операция біз үшін үлкен күйзеліс десек те болады, өйткені бір көзден қарағанда қарапайым хирургиялық әрекеттің өзі де, тұрақты келе жатқан жағдай дереу өзгеруі мүмкін. Мысалы, анестезия кезінде науқас кенеттен жөтеле бастады, қысымы көтерілді, мұндай жағдайлар туындаған кездерде біз бірден қажетті әрекет етуіміз керек. Ия, осындай ауыр ритмде жұмыс істеу оңай емес, бірақ барлығы тәжірибемен келеді. Бірақ әрдайым өзгеріссіз қалатыны– бұл жауапкершілік сезімі», – дейді Назым Бекішева өзінің күнделікті жұмысы туралы.
Анестезист-мейіргерлеріміздің көпшілікке көрінбейтін жұмысының тағы бір бөлігі бар – олар тек реанимация бөлімінде ғана емес, бүкіл Орталығымыздың ішінде «жедел жәрдем» қызметін атқарады. Нәзік жанды Назым да пациенттерге шұғыл көмек көрсетуге әрдайым дайын
«Біздің жұмысымызда әртүрлі жағдайлар болады. Пациенттердің ішінде қатерлі ісіктің асқынған түрімен, хоспистен келген науқастар ем алып келеді. Біреулер алып жатқан емін, мысалы, химиотерапияға немесе сәулелік терапияны ауыр көтереді, кейде қабылдау кезінде денсаулығы сыр бере бастайды. Бөлімшесінде телефон шырылдап, «көк код» десе, онда шұғыл көмек қажет дегендігін білдіреді. Қажетті жабдықтарымызды, дәрі-дәрмектерімізді алып, дереу шақырған бөлімшеге барамыз», -дейді анестезист медбике.
Орталығымызда еңбек етіп келген жылдар бойы Назым өзін жоғары білікті маман ретінде ғана емес, сонымен қатар жарқын, шығармашылық тұлға ретінде көрсете білді. Ол Орталықтың қоғамдық өміріне белсенді қатысады, кәсіподақтың белсенді мүшесі болып табылады, мерекелік концерттерде өнер көрсетіп, сахнада әр түрлі образдарға кіріп, мәнерлеп өлең оқу қабілетімен де әріптестерін таң қалдырады.
Жұмыста үлгілі маман және тамаша әріптес, ал үйде қамқор ана мен аяулы жар ретінде танытты. Назым жұбайымен бірге бір қыз, екі ұлын тәрбиелеп келеді. Балаларыңыздың біреуі сіздің ізіңізбен жүріп, медицина саласын таңдағанын қалайсыз ба деген сұраққа, қызметтің ыстық-суығын көрген Назым «Ия, әрине», – деген нақты жауап берді, себебі медицина ең адал және асыл мамандық деп бекер айтылмаған. Қоғамға қызмет ету-ең жоғары құрмет емес пе.
Олай болса, қорытындылай келе, бүкіл ұжым атынан Назым Бекішеваны лайықты марапатымен шын жүректен құттықтағымыз келеді, осындай қиын, бірақ маңызды ісінде табыстар, одан да биік белестерді бағындыруды тілейміз

Гүлдене бер менің Қазақстаным!

Қазақстан Тәуелсіздігінің 33 жылдығы қарсаңында бүгін Орталығымызда салтанатты іс-шара өтті. Кездесу барысында Тәуелсіз мемлекетіміздің маңызды жетістіктері, сондай-ақ ел мен қоғамның алдында тұрған міндеттер айтылды. Салтанатты іс-шараны аша отырып, Орталық директорының міндетін атқарушы Баян Бекетова құттықтау сөз сөйледі. «Құрметті әріптестер! Сіздерді Отанымыздың Тәуелсіздігінің 33 жылдығымен құттықтаймын! Бұл мереке біздің көпұлтты халқымыздың бостандыққа, бірлікке деген ұмтылысын білдіреді. Сонымен қатар, бүкіл қоғам болашақ ұрпақтың алдында жауапты екендігін де ұмытпау керек. Құрметті әріптестер, сіздер әрқайсыларыңыз игі істеріңізбен еліміздің өркендеуіне үлес қосып, мамандықтарыңызға адал болып, табандылық танытып, пациенттердің денсаулығы мен әл-ауқатын қорғау, нығайту жолында елеулі еңбек етіп жатырсыздар! Осындай республикамыздың ерекше айтулы мерекесі қарсаңында бірлігімізді сақтап, әрқашан бір-бірімізге қолдау көрсетіп, медициналық көмек сапасының жаңа биіктеріне ұмтылайық дегім келеді. Біздің елімізге, отанымызға бейбітшілік пен өркендеу тілеймін!»,- деді Баян Бейсенғалиқызы.
Сондай-ақ, салтанатты шара барысында мерекелік концерттік бағдарлама да ұсынылды.

Қазақстандағы БҰҰ даму бағдарламалары-тиімді ынтымақтастық және даму мүмкіндіктері

Бүгін Орталығымызда Қазақстандағы БҰҰ Даму Бағдарламасының өкілдері ресми сапармен келіп кетті. Кездесудің басты мақсаты ынтымақтастықты кеңейту, сондай-ақ өңірдің онкологиялық қызметін одан әрі дамытуға бағытталған бірлескен жобаларды іске асыру болды.
Естеріңізге сала кетейік, Біріккен Ұлттар Ұйымының Даму Бағдарламасы (БҰҰДБ) дамып келе жатқан елдерге БҰҰ желісі бойынша көмектің көп бөлігін үйлестіретін БҰҰ-ның даму саласындағы жетекші ұйымы болып табылады. Қазіргі уақытта ол 170 елде, оның ішінде Қазақстанда да жұмысын атқарып келеді.
Орталығымыздың халықаралық ұйымдармен жұмыс істеу тәжірибесі аз емес. Кездесуді аша отырып, БҰҰ өкілдері Орталықтың жұмысымен, өңірдегі онкологиямен сырқаттанушылық көрсеткіштерімен, қатерлі ісіктерді диагностикалау мен емдеудегі мүмкіндіктермен таныстырды. Халықаралық ұйымдармен ынтымақтастықтың мол тәжірибесі жайында да айтылды.
«Біз БҰҰ Даму бағдарламасының өкілдерімен жүздескенімізге қуаныштымыз. Орталығымыз Қазақстанда бірегей болып табылады, бізде ядролық медицина саласында кең мүмкіндіктеріміз бар. Мұнда Қазақстандағы әзірге жалғыз радиодиодтерапия бөлімшесі жұмыс істейді. Аймақтық деңгейде тек бізде ғана ПЭТ-зерттеулері жүргізіледі. Алайда, прогресс бір орында тұрмайды, сондықтан онкологиялық көмекті одан әрі дамыту үшін біз әрқашан ынтымақтастықты, бірлескен жобаларды қуана құптаймыз», – деп атап өтті Орталық директорының міндетін атқарушы Баян Бекетова.
БҰҰ-ның Қазақстандағы Даму Бағдарламасының өкілдері де екіжақты ынтымақтастыққа дайын екендіктерін білдірді.
«Осындай жылы қабылдағандарыңыз үшін рахмет. Орталықтың жұмысымен танысу – біз үшін үлкен қуаныш. Өз жайымда айтатын болсам, қатерлі дертпен күресудің қаншалықты қиын екенін жақсы білемін, сондықтан жоғары тиімділікке жету үшін бұл салада жаңа технологиялардың, диагностика мен емдеудің заманауи әдістері қаншалықты маңызды екенін де түсінемін. Ынтымақтастыққа келетін болсақ – БҰҰ-ның Қазақстандағы Даму бағдарламалары бірінші кезекте ел өңірлерінде жұмыс істеуге бағытталған. Төрт облыс, соның ішінде Абай облысы да басымдылыққа ие болып отыр», – деп атап өтті БҰҰ-ның Қазақстандағы Даму бағдарламасының Тұрақты өкілінің орынбасары Сухроб Ходжиматов.
Сухроб Ходжиматов атап өткендей, бірлескен ынтымақтастық үшін бағыттар аз емес. Бұл адам ресурстарын дамытуға, медициналық көмектің қолжетімділігін арттыруға, озық инновацияларды енгізуге, денсаулық сақтауды цифрландыруға және т.б. бағытталған жобалар.

Ядролық медицина және онкология орталығында дәрігер-хирургтар, химиотерапевтер мен радиологтардың қатысуымен дөңгелек үстел өтті.

Химиотерапия бөлімінің меңгерушісі Елемесов Нұрбол Нұрбекұлы «Асқазанның таралып кеткен метастазды қатерлі ісігінің HER2 ген гиперэкспрессиясын емдеуде, сондай-ақ сүт безі қатерлі ісігінде HER2 гиперэкспрессясында трастузумабты қолдану» тақырыбында баяндама жасады. Дәрігер-химиотерапевт Астаева Айгүл Болатбекқызы «Трастузумаб сүт безі қатерлі ісігінің метастазын емдеуде» тақырыбында баяндама ұсынды. Дәрігер-химиотерапевт Құмарова Гүлназ Құдайбергенқызы «Ритуксимаб таргетті препаратын мантилі-жасушалы лимфоманы емдеудің 1 желісінде қолдану» тақырыбында клиникалық жағдайды ұсынды.
Сонымен, дөңгелек үстел онкологиялық ауруға шалдыққан пациенттерге жоғары білікті медициналық көмекті дамытудың тағы бір қадамы болды.

Асқазан мен бауырдың қатерлі ісіктері туралы хабардар болу айы

Құрметті достар! Желтоқсан айы бойы біздің Орталығымызда асқазан мен бауырдың қатерлі ісіктері туралы хабардар болу айы өтеді. Осы уақыт ішінде Орталығымыздың жетекші сарапшылары, онкологтары асқазан мен бауыр обырының барлық ерекшеліктері, алдын алу шаралары, диагностикалау мен емдеудің негізгі тактикасы туралы айтатын болады. Сондықтан маңызды ақпаратты жіберіп алмау үшін, егер сізер әлі әлеуметтік желілердегі біздің парақшаларымызға жазылмаған болсаңыздар – міндетті түрде жазылуларыңызды сұраймыз. Пайдалы сілтемелермен бөлісуді де ұмытпаңыздар!

Жаңа білім – жаңа мүмкіндіктер!

Біздің орталықтың жетекші мамандары медициналық көмек көрсету сапасын арттыру үшін Қазақстанның, сондай-ақ жақын және алыс шет елдердің жетекші ғылыми және клиникалық орталықтарында оқудан өтуде. Осылайга өткен айда бірқатар мамандар Қазақ онкология және радиология ғылыми-зерттеу институтында біліктілікті арттыру курстарын аяқтады.
Онкохирург Зәуре Жанабилова «Бауыр, ұйқы безі, ішек ісіктерінің аурулары» курсы бойынша оқуды аяқтады. Әлеуметтік қызметкер Теңлік Баттакова – «Амбулатрлық деңгейде онкологиялық науқастарға паллиативтік көмек көрсету мәселелері» циклі бойынша оқудан өтті.
Оқу курстарынан өту – әрқашан жаңа білім, демек, жаңа мүмкіндіктер. Біз әріптестерімізге сәттілік пен үлкен жетістіктер тілейміз.

Тәжірибе және білім алмасу

Осы айда Қазақстанның түкпір-түкпірінен келген онкогинекологтарға 20 жылдан астам тәжірибесі бар еліміздің жетекші онкогинекологы, медицина ғылымдарының кандидаты, ҚазОРҒЗИ онкогинекология орталығының басшысы Ерлан Кукубасовтың басшылығымен оқыту курстары өткізілді.
Аталған курстарда білім алмасқандардың қатарында Орталығымыздың онкогинеколог дәрігері Лаззат Аликенова. Қатерлі және қатерсіз дерттердің, әйелдердің ұрпақты болу жүйесінің әртүрлі патологияларын, соның ішінде жатыр мойны, жатыр, аналық бездерді диагностикалау мен емдеудің негізгі әдістері қарастырылды.
Айта кету керек, осындай курстардың арқасында дәрігерлер білім тәжірибесін кеңейтіп қана қоймай, сонымен қатар қатерлі ісік түрлерін диагностикалау мен емдеуде озық әдістерді енгізуге мүмкіндік береді.

Цитостатикалық дәрілік заттарды орталықтандырылған сұйылту кабинеттерінде ісікке қарсы препараттарды ұтымды пайдалану және қауіпсіз өңдеу

Онкологиялық қызметтің жұмысында сапалы медициналық көмек көрсетуде ең озық жабдықты немесе заманауи медициналық препараттарды қолдану ғана емес, ең негізгі факторлардың бірі – медицина қызметкерлерінің кәсібилігі мен біліктілігінің жоғары деңгейі. Сондықтан біздің Орталығымызда барлық деңгейде қызметкерлер біліктілігінің үздіксіз өсуіне ерекше көңіл бөлінеді. Осының арқасында дәрігерлер, мейіргерлер және басқа да мамандар Қазақстанның ғана емес, сонымен қатар алыс – жақын шет елдердің жетекші ғылыми орталықтары мен клиникаларында үнемі оқытудан өтуге мүмкіндігі бар. Мәселен, осы айда химиотерапия бөлімшесінің аға медбикесі Назгүл Батталова, сондай-ақ химиотерапия бөлімшесінің мейіргері Гүлжанат Темірбаева мен Төлеуғайша Рахметуллина Қазақ онкология және радиология ғылыми-зерттеу институтының базасында біліктілікті арттыру бойынша апталық курстардан өтіп келді. Оқытудың басты тақырыбы – «Цитостатикалық дәрілік заттарды орталықтандырылған сұйылту кабинеттерінде ісікке қарсы препараттарды ұтымды пайдалану және қауіпсіз өңдеу» болды.
Орталықта ісікке қарсы препараттармен жұмыс барлық стандарттар мен талаптар бойынша жүзеге асырылатынына қарамастан, тәжірибе алмасу осы бағытты одан әрі жетілдіруге мүмкіндік береді.

Орталығымыздың онкологтары XXVIII Ресей онкологиялық конгресінің жұмысына қатысты

Жақында Мәскеуде Орталығымыздың химиотерапевт-дәрігері Жаннұр Алтыбаева XXVIII Ресей онкологиялық конгресінің жұмысына қатысты.
Ресейдің онкологиялық конгресі- көрші мемлекеттегі ең ірі ұлттық онкологиялық шара болып табылады. Онкологиялық Конгрестің жұмыс күндерінде пленарлық сессиялар, дәрістер, шеберлік сабақтары, сондай-ақ сателлиттік симпозиумдар өткізілді. Дәстүрлі түрде кәсіби және ғылыми қоғамдармен бірлескен сессиялар да өтті.
Бағдарламада өткен жылы қатерлі ісіктерді диагностикалау мен емдеудегі негізгі жетістіктерді көрсететін жетекші ресейлік және шетелдік онкологтардың баяндамалары ұсынылды. Оған қоса, Ресей нарығында ұсынылған ірі фармацевтикалық компаниялардың, сондай-ақ кітап және журнал жаңалықтарының көрмелері ұйымдастырылды.

Кезекті Ашық есік күні өтті!

Осы сенбіде Орталығымызда өкпе, ұйқы безі және простата обыры туралы хабардарлықты арттыруға және ерте анықтауға бағытталған кезекті Ашық есік күні өтті.
Бұл күні онкологтармен кеңесуден басқа, кешенді тексерулер жүргізілді. Ашық есік күнінің қорытындысы бойынша пациенттердің ешқайсысына онкологиялық ауру немесе қатерлі ісікке күдікті диагнозы да қойылмағанын атап өткіміз келеді, алайда дәрігерлер көптеген басқа ауруларды анықтады, мысалы, 16 пациентте созылмалы бронхит, 8 пациентте панкреатит және бір пациентте бауыр кистасы диагнозы қойылды. Барлық анықталған дерттер бойынша пациенттерге ұсыныстар берілді.

Клиникалық хаттаманың жобасы қалың жұртшылықтың талқылауына ұсынылуда.

Құрметті әріптестер және медициналық қауымдастық өкілдері

«Самарий-153 радиофармацевтикалық препаратымен сүйек метастаздарын жүйелі радионуклидті емдеу» тақырыбындағы Клиникалық хаттаманың жобасы қалың жұртшылықтың талқылауына ұсынылуда.

Бұл Хаттама сүйек метастаздарын емдеу үшін радиофармацевтикалық самарий-153 препаратын қолданудың заманауи стандарттарын белгілеу мақсатында, сондай-ақ осы патологиядан зардап шегетін науқастар үшін оңтайлы клиникалық нәтижелерді қамтамасыз ету үшін әзірленген.

Біз барлық мүдделі мамандарды – дәрігерлерді, ғалымдарды, зерттеушілерді, сондай-ақ денсаулық сақтау ұйымдарының өкілдерін Хаттама жобасымен танысуға және өз ұсыныстары мен пікірлерін айтып, ескертулерін білдіруге шақырамыз.

Талқылау ашық форматта, пікірлерді электронды пошта арқылы жіберу мүмкіндігімен өтеді.

Сіздердің пікірлеріңіз бен ұсыныстарыңыз құжатты пысықтап, түпкілікті өңдеу және пациенттерге медициналық көмек көрсету сапасын жақсарту үшін маңызды.

Пікірлер мен ұсыныстарды жіберуге арналған байланыс ақпараты: mail@semeyonco.kz

Медициналық стандарттарды әзірлеуге қатысқаныңыз және белсенділік танытқаныңыз үшін рахмет!

Благодарим за участие и активное содействие в развитии медицинских стандартов!

Құжатты жүктеп алу

?Тәжірибе және білім алмасу!

Біздің Орталықтың маңызды бағыттарының бірі – мамандарымыздың біліктілігін, білімі мен тәжірибесін үздіксіз арттыру. Бұл бағытта біздің жетекші серіктестеріміздің бірі Қазақ онкология және радиология ғылыми-зерттеу институты болып табылады, ол түрлі оқыту семинарларын, мастер-класстар мен форумдарды өткізу үшін тиімді алаңға айналды.
ҚазОРҒЗИ-де «Асқазан-ішек скринингіндегі заманауи эндоскопиялық технологиялар» бағдарламасымен біліктілікті арттыру циклі бойынша Орталықтың дәрігер-онкологы Насибуллин Едил Рафаилұлы оқытудан өтті.
Біз Қазақ онкология және радиология ғылыми-зерттеу институтының әріптестеріне жемісті ынтымақтастық, тәжірибе және білім алмасқан үшін алғысымызды білдіреміз.

14-16.11.24 ж. Алматы қаласында “Онко Ренессанс -2024. Күзгі сессия” атты халықаралық ғылыми-тәжірибелік конференция өтті.

15.11.24 ж. «Жас ғалымдар байқауы» секциясында профессор Д.Р.Мусинов атындағы Клиникалық онкология және ядролық медицина кафедрасының докторанты Рахманқұлова Айдана Манарқызы «ҚР пациенттеріндегі радиойодрезистентті жоғары сараланған қалқанша без обырының клиникалық ерекшеліктері. Алдын ала нәтижелер» тақырыбында баяндама жасады. 16.11.24 ж. «Ядролық медицина және тераностика мектептері» секциясында Радионуклидті терапия бөлімінің меңгерушісі Есболатова Назигүл Сайлаубайқызы «Қалқанша без ауруларының радиойодты терапиясы (ЯМжОО РНТ деректері бойынша)» тақырыбында баяндама жасады.
Абай облысы денсаулық сақтау басқармасының ЯМжОО базасындағы радионуклидті терапия бөлімі Қазақтан Республикасында алғашқы және әзірге жалғыз болып табылатындықтан, бүгінгі күні біздің дәрігерлердің зерттеулері өте өзекті болып табылады!
16.11.24 ж. Жас ғалымдар байқауының нәтижелері шығарылды. Докторант А.М.Рахманқұлова «Көрермендер көзайымы» номинациясын жеңіп алды.

Өкпе қатерлі ісігі: алдын алу және ерте анықтау

Абай облысы білім басқармасының «Көлік колледжі» КМҚК білім алушыларына арналған дәріс өтті. Дәріс барысында өкпе қатерлі ісігінің ерекшеліктері, оның алдын алу, анықтау және емдеу шаралары туралы сұрақтар қозғалды. Дәрісті маммология және гинекология бөлімінің дәрігері Мадина Азиатқызы Мұсылманова оқыды.
Өкпе қатерлі ісігі ― анағұрлым кең таралған онкопатологияның бірі. Ол бронх немесе альвеола шырышты қабықшадағы жасушалардың қатерленуімен сипатталады.
Өкпе қатерлі ісігінің белгілері
Өкпе қатерлі ісігінің көріністері патологиялық процестің локализациясына, оның даму кезеңіне, жақын және алыс орналасқан ішкі органдардың қатыстылығына байланысты.
Биологиялық кезең өкпе жасушаларының қатерлі ісікке айналу сәтінен басталып, рентгенологиялық белгілер пайда болғанға дейін созылады. Әдетте, бұл кезеңде клиникалық көрініс мүлдем болмайды.
Белгісі болмаған кезеңде симптомдар жоқ немесе олар соншалықты айрықша емес, адам оларды аурумен байланыстырмайды, көбінесе оларды шаршағандық пен өмірдің қатаң ырғағына сілтейді. Оларға ұйқышылдық, әлсіздік, еңбек қабілетінің төмендеуі, тәбеттің болмауы, салмақ жоғалуы жатады.
Клиникалық кезеңде симптомдары пайда болады да біртіндеп өсе береді. Өкпе қатерлі ісігінің анағұрлым кең таралған белгілері мыналар:
• жүйесіз жөтел (көбінесе шырышты-іріңді қақырықтың бөлінуімен);
• қанды қақырық;
• дауыстың қарлығуы (кезбе нервтің қысылуына байланысты);
• субфебрильді қызба;
• кеуде тұсындағы ауырсыну;
• ентігу.

Мобильді бригада Бесқарағай ауданында.

Сапалы және қолжетімді онкологиялық көмекпен қамтамасыз ету – біздің Орталықтың басым міндеті болып табылады. Осы мақсатты іске асыру үшін көптеген шаралар қолданылмақ, оның бірі – шалғай аудандардың тұрғындарына арналған көшпелі мобильді бригадалар. Көшпелі жұмыс кезінде дәрігерлер денсаулық сақтаудың әртүрлі бағыттары бойынша тексерулер мен консультациялар жүргізеді.
Осы күндері көшпелі мобильді бригада Бесқарағай ауданының бірқатар ауылдарының тұрғындарына, оның ішінде Мостик және Кананерка ауылдарының тұрғындарына қабылдаулар өткізді. Тексерулер барысында пациенттерде әртүрлі патологиялар, соның ішінде онкологияға күдікті аурулар да анықталды.

?4 қарашада Ядролық медицина және онкология орталығының онкологтардың мобильді бригадасы Курчатов қаласына, Дегелен станциясына, Молдары ауылына барды.

32 пациентті қарады, маммолог 8 пациентті қабылдады, онкогинеколог 10 пациентті қабылдады, 22 ультрадыбыстық зерттеу жүргізді, жіңішке инелі биопсия арқылы 7 материал жинады, қатерлі ісікке 1 күдік, 2 қатерлі ісік алды аурулары және 5 басқа ауру анықталды.

Онкологтардың көшпелі мобильді бригадасының жұмысы жалғасуда

Қымбатты достар! Күнделікті жұмысымызда ауылдар мен аудан тұрғындарының, әсіресе шалғайдағылардың қалаға арнайы тексеруден өтуге немесе медициналық көмектің толық кешенін алуға мүмкіндігі бола бермейтін жағдайларын жиі кездестіреміз. Бұл әртүрлі асқынуларға және азаматтардың денсаулығының нашарлауына әкелуі мүмкін.
Ауыл тұрғындарына мамандандырылған медициналық көмектің қолжетімділігін арттыру мақсатында 2024 жылдың 5-6 қарашасы аралығында онкологтардың мобильді бригадасының кезекті сапары болды, бұл жолы Бородулиха ауданына. Дәрігер-радиолог Светлана Рахимовна Удеринаның жетекшілігімен барған мобильді топтың құрамында онкомаммолог Бәтима Қайратқызы Жайықова және сонолог Даулет Серікханұлы Оспанов болды.
Осы күні 73 адам тексерілуден өтті, онкомаммологтың тексерілуінен 14 пациент өтті, онкохирургтың қабылдауында 19 пациент болды. Онкогинеколог ретінде Удерина Светлана Рахимовна 26 пациент қабылдады. 26 пациентке сүт бездерінің УДЗ жасалды.

ҚР Президентінің Іс Басқармасы Медициналық орталығы ауруханасының мамандары өткізген оқыту семинары

Бүгін біздің Орталығымызда ядролық медицина және фармацевтикада халықаралық стандарттары саласында оқыту семинарлары өтуде. Оқытуды ҚР Президентінің Іс Басқармасы Медициналық орталығы ауруханасының жетекші мамандары жүргізуде.
«Біздің Медициналық орталықтан Абай облысына аритмологтар, кардиохирургтер, терапевтер, ядролық медицина және тағы басқа саласындағы мамандардың үлкен тобы іс-сапармен келіп отыр, өңірдің бірқатар ауруханаларында кездесулер өткізіп келеміз. Біздің басты мақсатымыз – тәжірибе алмасу, біздің ауруханада қолданылатын диагностика мен емдеудің озық әдістемелерін өңірлерде кеңейтуге ықпал ету», – деп оқытудың негізгі мақсаттарын семинар спикерлерінің бірі, ҚР Президентінің Іс Басқармасы Медициналық орталығы ауруханасының ядролық медицина Орталығының радиоизотоптық диагностика бөлімшесінің меңгерушісі Тимур Сәрсенғали атап өтті.
Айта кету керек, ҚР Президентінің Іс Басқармасы Медициналық орталығы ауруханасының мамандарында Семейлік әріптестерімен бөлісетін тәжірибе аз емес сияқты. Қазіргі уақытта аурухана Қазақстанда диагностикалық тексерулер жүргізу барысында радиофармпрепараттардың 7 атауын пайдаланатын әзәрге бір ғана аурухана болып табылады. Сонымен қатар, ҚР ПІБ МО ауруханасының ядролық медицина орталығында радиоизотоптық зерттеулердің барлық түрлері, соның ішінде сцинтиграфия, ОФЭКТ/КТ және ПЭТ/КТ жүргізіледі.
«Мен сіздің ядролық медицина орталығының ішкі құрылымын көріп, мамандармен танысқаныма қуаныштымын. Сіздердің Орталықтарыңыз бүкіл ел үшін өте маңызды, себебі тек осы жерде радиоиодтытерапия қолданылады. Сонымен қатар, Орталықта қолданылатын радиофармпрепараттардың ауқымын кеңейту үшін үлкен әлеует бар. Бұл бағытта біз тығыз жұмыс істеуге, өзара ынтымақтастықты кеңейтуге, тәжірибе алмасуға дайынбыз», – деп атап өтті Тимур Сәрсенғали.
Өкінішке орай, оқыту семинарлары бір күн ғана өтеді. Алайда, екі клиниканың ынтымақтастығы болашақта тек кеңейе түсетін болады. Тимур Сәрсенғали атап өткендей, көп ұзамай ҚР ПІБ МО ауруханасының ядролық медицина орталығының базасында тікелей оқудан өту үшін біздің мамандардың Елордаға сапары жоспарланатын болады.